Udhëzime të përgjithshme për skemën e internshipeve

UDHËZIME TË PËRGJITHSHME

PËRSHKRIM I PËRGJITHSHËM I PROGRAMIT:

Në kuadrin e programit YEM – Youth Employment and Migration të ndërmarrë nga Kombet e Bashkuara, iniciativa në lidhje me internship-et/praktikat do të zbatohet në kontekstin e partneriteteve publik dhe privat (Public Private Partnership - PPP). Të administruara nga programi YEM, skemat e praktikave do të zbatohen në bashkëpunim të ngushtë me sektorin privat. Kjo iniciativë do të përfshijë Rrjetin e Studentëve Shqiptarë në Botë (AS@N), Dhomën e Tregtisë dhe Industrisë Britanike dhe Shqiptare (ABBCCI), Dhomën e Tregtisë dhe Industrisë Tiranë,  Unionin e Dhomave të Tregtisë dhe Industrisë së Shqipërisë, Shoqata e Sipërmarrësve Italianë në Shqipëri (AIIOA), shoqata të sipërmarrësve shqiptarë e të huaj, Programin YEM dhe kompani private në të gjithë Shqipërinë.  
Përse Praktika / Internship-e?
Praktikat janë një periudhë e trajnimit profesional që synon të orientojë studentët drejt vendit të punës, ndërkohë që janë në përfundim të studimeve të tyre. Praktikat janë mjaft të rëndësishme për studentët të cilët bëjnë një zgjedhje të informuar në lidhje me fushën në të cilën ata do të ndërtojnë karrierën e tyre pas diplomimit në universitet.  Qëllimi i një praktike është forcimi dhe zhvillimi i  aftësive profesionale të studentëve/të sapodiplomuarve. Gjatë praktikës studentët/të sapodiplomuarit mund të përballen me lidhjet ndërpersonale me kolegët dhe mbikqyrësit të tij/saj, të cilat janë mjaft të rëndësishme për ndërtimin e një karriere të suksesshme.  

Praktikat do të lehtësojnë jo vetëm zgjedhjen e karrierës së studentëve, por dhe të punëdhënësit mbi individin që i përshatet më mirë kompanisë. Punëdhënësit do të përfitojnë gjithashtu nga njohuria dhe praktika perëndimore që kanë përfituar studentët/të sapodiplomuarit jashtë vendit.

Objektivi i kësaj iniciative është të përmirësojë kapacitetet, gatishmërinë për punë dhe aftësimin e të rinjve studentë/të sapodiplomuar jashtë për integrimin e tyre në ekonominë shqiptare.  Përmes internship-eve/praktikave, projekti do të mbështesë gjenerimin e punësimit të qëndrueshëm dhe të ardhura për të sapodiplomuarit shqiptarë jashtë vendit.
Grupi i të rinjve shqiptarë që do të përfshihen në këtë iniciativë synohet që të përfshijë të rinj të cilët kanë përfunduar studimet e tyre gjatë 9 muajve të fundit dhe të jenë deri në moshën 28 vjec.

PËRFITIMET PËR KOMPANITË

Disa nga përfitimet kryesore për kompanitë që do të marrin pjesë në program janë:

1.    Ekspozimi ndaj një grupi të rinjsh me prespektivë,  të motivuar e të talentuar. Pjesëmarrja në programin e praktikave i ofron kompanive ekspozim të menjëhershëm ndaj liderëve të ardhshëm në fushat përkatëse. Në vend që të rekrutojnë përmes metodave tradicionale, kompanive do t’u mundësohet aksesi i drejtpërdrejtë tek kandidatët e mirëarsimuar dhe mjaft të kualifikuar.

2.    Shkëmbimi i njohurive. Studentët/të sapodiplomuarit shqiptarë jashtë vendit kanë përvojë, dije bashkëkohore, arsim të nivelit të lartë, kulturë e mentalitet global, si dhe një etikë të lartë pune. Kompania mund të ketë përfitim të drejtpërdrejtë nga njohuritë e tyre dhe nga shkëmbimi i përvojës me anëtarë të tjerë të stafit.

3.    Reputacioni i një kompanie progresiste. Kompanitë që rekrutojnë të rinjtë e diplomuar jashtë si praktikantë janë pikërisht kompanitë lider në rajon. Këto kompani, si dhe të tjera që përdorin këtë metodë rekrutimi, e kuptojnë më së miri rëndësinë e rekrutimit të talenteve si pjesë e rritjes së kompanisë në të ardhmen.


KRITERET E PËRZGJEDHJES
Të gjithë kompanitë private shqiptare nxiten të marrin pjesë në program dhe të ofrojnë pozicione pune për studentët/të sapodiplomuarit ne formën e praktikës.
Kërkesat minimale për cdo kompani që do të përfshihet në proces i  referohen:  

•    Kompanive që kanë të paktën 3 të punësuar;
•    Kompanitë janë regjistruar të paktën 6 muaj përpara fillimit të programit.;
•    Kompani që kanë paguar rregullisht sigurimet shoqërore dhe taksat në autoritetet përkatëse dhe kanë një llogari bankare në një institucion të autorizuar bankar;
•    Kompanitë që përmbushin rregullat e sigurisë së jetës në përputhje me standardet profesionale kombëtare për shëndetin;

AFATET KOHORE
•    Praktikat do të zgjasin 3 muaj nga data e fillimit si pjesë e Programit të Skemës së Praktikave. Në fund të 3 muajve kompanitë pritet të mbajnë praktikantët për një periudhë 3 mujore shtesë për të cilën nënshkruhet një kontratë internship-i/praktike mes kompanisë dhe pjesëmarrësve në program.
•    Kompanitë nxiten të ofrojnë poste praktikash në vazhdimësi pasi programi do të pranojë aplikime deri më 31 Dhjetor 2010.

MBIKËQYRJA
•    Kompanitë që do të ofrojnë praktika caktojnë një pjesëtar të stafit të tyre i cili mbikëqyr  praktikantin.
•    Mbikëqyrësi  përcakton rolin e praktikantit dhe i cakton detyra me afate kohore që duhet të plotësohen, nëpërmjet së cilave do të vlerësohet puna e praktikantit/es.

PËRSHKRIMI I PUNËS SË PRAKTIKANTIT/ES

Kompanitë e interesuara në praktika do të nënshkruajnë një marrëveshje me praktikantin që do të jetë përzgjedhur nga Paneli i Përzgjedhjes.  Kjo marrëveshje duhet të përfshijë detyra specifike, aftësi të pritshme, orë normale pune të planifikuara, emrin e mbikëqyrësit dhe pozicionin, vendodhjen e praktikës, etj (një model marrëveshjeje do të ofrohet nga program YEM).

KOMPENSIMI

•    Gjatë 3 muajve të parë të praktikës, praktikantëve do t’u ofrohet një pagesë bazë nga programi YEM.
•    Gjatë fazë së punësimit kompania dhe pjesëmarrësi në program do të bëjnë një marrëveshje në lidhje me kompensimin në përputhje me kërkesat e Kodit të Punës.

PROCESI I ZBATIMIT

• Kompania do të aplikojë për të marrë pjesë në program përmes dorëzimit të formularit të aplikimit në të cilin përcaktojë kërkesat dhe detyrimet e kompanisë në lidhje me pozicionin e paraktikës.
• Pozicionet e praktikave do të publikohen në internet në faqen zyrtare të programit.
• Pasi të informohen për profilin e kompanisë dhe për kërkesat e përcaktuara nga kompanitë, studentët do të kenë mundësinë të aplikojnë për pozicionet e praktikave duke plotësuar formularin në internet.
• Paneli i  përzgjedhjes do të kryejë lidhjen mes aplikimeve dhe do të zgjedhë kandidatin më të përshtatshëm për pozicionet e disponueshme.
• Të rinjtë e përzgjedhur do të udhëtojnë nga vendet në të cilat ndodhen dhe do të orientohen nga programi për zhvillimin e trajnimit.
• Praktika/internship-i do të zhvillohet sipas marrëveshjes përkatëse me kompanitë.