Punësimi i të Rinjve - Takim i aktorëve të ndryshëm mbi promovimin dhe nxitjen e punësimit nga qeveria shqiptare

Brenda tre viteve do të punësohen 48 mijë të rinj, nga zbatimi i projektin “Migrimi i Rinisë - Vjelja e përfitimeve dhe zbutja e risqeve”, pjesë e programit “Një OKB”, një nismë që synon nxitjen e punësimit të të rinjve, për të minimizuar rreziqet e përfshirjes në migracionin e parregullt, përmes përmirësimit të prodhimtarisë, shndërrimit të ndërmarrjeve informale dhe kushteve më të mira të punës, duke qene se punësimi i të rinjve është kyç për uljen e varfërisë dhe zhvillimin e vazhdueshëm.

Programi i përbashkët për Rininë, Punësimin dhe Migrimin do të zbatohet nga ILO, IOM, PNUD dhe UNICEF, në bashkëpunim Ministrinë e Punës, Çështjeve Sociale dhe Shanseve të Barabarta dhe Ministrinë e Punëve të Jashtme.  Ai synon të mbështesë përpjekjet e Qeverisë shqiptare për të integruar përparësitë e politikave të Strategjisë Kombëtare për Zhvillim dhe Integrim (SKZHI 2007-2013) për punësimin e të rinjve dhe migrimin me strategjitë e punësimit dhe trajnimit profesional. Rezultatet e pritshme përfshijnë përmirësimin e kapaciteteve të Qeverisë shqiptare për të monitoruar treguesit e tregut të punës për të rinjtë, përmirësimin e njohurive dhe të kuptuarit të politikave të integruara dhe masave për të trajtuar ekonominë informale dhe ndikimin e saj në migrim, etj”.