Guida për aplikim

UDHEZIME TE PËRGJITHSHME PER STUDENTET/TE SAPO DIPLOMUARIT

PËRSHKRIM I PËRGJITHSHËM I PROGRAMIT:

Në kuadrin e programit YEM – Youth Employment and Migration të ndërmarrë nga Kombet e Bashkuara, iniciativa në lidhje me internship-et/praktikat do të zbatohet në kontekstin e partneriteteve publik dhe privat (Public Private Partnership - PPP). Të administruara nga programi YEM, skemat e praktikave do të zbatohen në bashkëpunim të ngushtë me sektorin privat. Kjo iniciativë do të përfshijë Rrjetin e Studentëve Shqiptarë në Botë (AS@N), Dhomën e Tregtisë dhe Industrisë Britanike dhe Shqiptare (ABBCCI), Dhomën e Tregtisë dhe Industrisë Tiranë,  Unionin e Dhomave të Tregtisë dhe Industrisë së Shqipërisë, Shoqata e Sipërmarrësve Italianë në Shqipëri (AIIOA), shoqata të sipërmarrësve shqiptarë e të huaj, Programin YEM dhe kompani private në të gjithë Shqipërinë.  

Përse Praktika / Internship-e?

Praktikat janë një periudhë e trajnimit profesional që synon të orientojë studentët drejt vendit të punës, ndërkohë që janë në përfundim të studimeve të tyre. Praktikat janë mjaft të rëndësishme për studentët të cilët bëjnë një zgjedhje të informuar në lidhje me fushën në të cilën ata do të ndërtojnë karrierën e tyre pas diplomimit në universitet.  Qëllimi i një praktike është forcimi dhe zhvillimi i  aftësive profesionale të studentëve/të sapodiplomuarve. Gjatë praktikës studentët/të sapodiplomuarit mund të përballen me lidhjet ndërpersonale me kolegët dhe mbikqyrësit të tij/saj, të cilat janë mjaft të rëndësishme për ndërtimin e një karriere të suksesshme.  

Praktikat do të lehtësojnë jo vetëm zgjedhjen e karrierës së studentëve, por dhe të punëdhënësit mbi individin që i përshatet më mirë kompanisë. Punëdhënësit do të përfitojnë gjithashtu nga njohuria dhe praktika perëndimore që kanë përfituar studentët/të sapodiplomuarit jashtë vendit.

Objektivi i kësaj iniciative është të përmirësojë kapacitetet, gatishmërinë për punë dhe aftësimin e të rinjve studentë/të sapodiplomuar jashtë për integrimin e tyre në ekonominë shqiptare.  Përmes internship-eve/praktikave, projekti do të mbështesë gjenerimin e punësimit të qëndrueshëm dhe të ardhura për të sapodiplomuarit shqiptarë jashtë vendit.
Grupi i të rinjve shqiptarë që do të përfshihen në këtë iniciativë synohet që të përfshijë të rinj të cilët kanë përfunduar studimet e tyre gjatë 9 muajve të fundit dhe të jenë deri në moshën 28 vjec.


PËRFITIMET PËR STUDENTËT

Disa nga përfitimet kryesore për studentët që do të marrin pjesë në program janë:

•     I jep mundësinë studentit/të saposiplomuarit të pasurojë trajnimin e tij akademik duke aplikuar njohuritë e tij akademike në punën praktike;
 

•     I krijon mundësinë studentit/të sapo diplomuarit të aplikojë instrumentet dhe procedurat logjike të përdorura në fushën në të cilën po specializohet;

•     E  inkurajon studentin/të sapo diplomuarin të vërë dijet dhe aftësitë e tij në praktikë;

•     I mundëson studentit/të sapo diplomuarit të marrë eksperiencë të majftueshme në lidhje më fushën përkatëse;

•     Lehtëson kalimin nga jeta akademike në jetën lavorative;

•     I ofron studentit/të sapo diplomuarit mundësinë e përmbushjes së objektivave profesionale dhe personale;

•     I krijon studentit/të sapo diplomuarit mundësinë e njohjes së ambjentit dhe praktikës së punës në Administratën Publike dhe Kompanitë Private në Shqipëri;

•     I mundëson studentit/të sapo diplomuarit krijimin e kontakteve dhe komunikimin me punëdhënës të ndryshëm;

•     Lehtëson zgjedhjen e studentit/të sapo diplomuarit për kthimin në atdhe dhe fillimin e një kariere të sukseshme në Shqipëri.

                                  


REGJISTRIMI  

Fillimisht REGJISTROHUNI, me formularin përkatës që ndodhet në web, më pas, në pjesën "Kerkon Pune" do të gjeni informacionin e detajuar mbi secilin prej internshipeve të mundësuara nga programi. Numri i mundësive do të jetë në rritje të vazhdueshme, sipas kohës në të cilën kompanitë/institucionet japin disponibilitetin e tyre, pas kërkesës së dërguar nga AS@N dhe nga Institucionet të cilat bashkepunojnë në këtë inciativë.

Secila prej kompanive/insitucioneve ka paraqitur në hapësirën përkatëse informacionet e nevojshme për secilën prej praktikave, kërkesat në lidhje me llojin e diplomës, vitin e studimit, etj, të studentëve që kërkohen. Kujdesuni që t’i plotësoni rekuizitet e kërkuara nga kompanitë përpara se të aplikoni për një internship, pasi gjatë përzgjedhjes ato do të jenë një nga kriteret bazë.

APLIKIMI ONLINE

Në pjesën "Apliko" do të gjeni një formular i cili duhet të plotësohet sipas rekuiziteve të nevojshme. Në mënyrë që procedura të zhvillohet në afatet e duhura, ju lutemi të na dërgoni formularët e plotësuar sa më parë të jetë e mundur. Një pjesë e rëndësishme e formularit është edhe Curriculum Vitae , i cili do të lehtësojë dhe do të optimizojë përzgjedhjen nga ana e kompanive/institucioneve. Pozicionet e ofruara nga kompanitë do të jenë në përditësim të vazhdueshëm.

KRITERET E PËRZGJEDHJES

Formulari i plotësuar nga studentët do t'u dorëzohet kompanive/institucioneve përkatëse dhe nëse do të përmbushin karakteristikat e kërkuara prej tyre, do të përzgjidhen për të filluar "Internship-in" në periudhën e zgjedhur. Një grup pune, me ekspertë të fushës, drejtues të projektit, përfaqësues të kompanive përkatëse, etj, do të bëjë përzgjedhjen përkatëse.

Rekuizitet minimale për cdo përfitues të  programit do të jenë:

a.    Studentë Shqiptarë nëpër botë që janë diplomuar në jo më shumë se 9 muaj përpara fillimit të programit
b.    Mosha deri ne 29 vjeç
c.    Me nivel të larte arsimor dhe rezultate të larta
d.    Përparësi u jepet grave dhe personave me aftësi të kufizuara
e.    Përparësi u jepet aplikantëve me profile që nuk ofrohen nga sistemi universitar lokal


PROCESI I ZBATIMIT

•     Pozicionet e praktikave do të publikohen në internet në faqen zyrtare të programit.
•     Pasi të informohen për profilin e kompanisë dhe për kërkesat e përcaktuara nga kompanitë, studentët do të kenë mundësinë të aplikojnë për pozicionet e praktikave duke plotësuar formularin në internet.
•     Paneli i  përzgjedhjes do të kryejë lidhjen mes aplikimeve dhe do të zgjedhë kandidatin më të përshtatshëm për pozicionet e disponueshme.
•     Të rinjtë e përzgjedhur do të udhëtojnë nga vendet në të cilat ndodhen dhe do të orientohen nga programi për zhvillimin e trajnimit.
•     Praktika/internship-i do të zhvillohet sipas marrëveshjes përkatëse me kompanitë.

 

AFATET KOHORE

•    Praktikat do të zgjasin 3 muaj nga data e fillimit si pjesë e Programit të Skemës së Praktikave. Në fund të 3 muajve kompanitë pritet të mbajnë praktikantët për një periudhë 3 mujore shtesë për të cilën nënshkruhet një kontratë internship-i/praktike mes kompanisë dhe pjesëmarrësve në program.

MBIKËQYRJA

•    Kompanitë që do të ofrojnë praktika caktojnë një pjesëtar të stafit të tyre i cili mbikëqyr  praktikantin.
•    Mbikëqyrësi  përcakton rolin e praktikantit dhe i cakton detyra me afate kohore që duhet të plotësohen, nëpërmjet së cilave do të vlerësohet puna e praktikantit/es.

PËRSHKRIMI I PUNËS SË PRAKTIKANTIT/ES

Kompanitë e interesuara në praktika do të nënshkruajnë një marrëveshje me praktikantin që do të jetë përzgjedhur nga Paneli i Përzgjedhjes.  Kjo marrëveshje duhet të përfshijë detyra specifike, aftësi të pritshme, orë normale pune të planifikuara, emrin e mbikëqyrësit dhe pozicionin, vendodhjen e praktikës, etj (një model marrëveshjeje do të ofrohet nga programi YEM).

PAGESAT

•    Gjatë 3 muajve të parë të praktikës, praktikantëve do t’u ofrohet një pagesë simbolike nga programi YEM, prej afërsisht 15.000 Lekë në muaj.
•    Gjatë fazë së punësimit 3 mujor kompania dhe pjesëmarrësi në program do të bëjnë një marrëveshje në lidhje me kompensimin në përputhje me kërkesat e Kodit të Punës.
•    SHPENZIMET E UDHËTIMIT për në Shqipëri do të mbulohen nga programi.

KOMUNIKIMI

AS@N do të funksionojë si një urë lidhëse ndërmjet studentëve dhe kompanive/institucioneve duke qarkulluar informacion të vazhdueshëm dhe duke qënë pika e kontaktit për çështjet që kanë të bëjnë më zhvillimin e internshipeve. Për çdo sqarim të mëtejshëm, pyetje, sygjerim, etj, ju lutem të mos hezitoni të na kontaktoni.